सोलुखुम्बु । सोलुदूधकुण्ड नगरपालिका– ८ केरुङस्थित श्री चाँगेस्थान माध्यमिक विद्यालयका १९५ भन्दा बढी विद्यार्थीलाई विद्यालय पोशाक हस्तान्तरण गरिएको छ। मोनभिसो नेपाल फाउन्डेसन काठमाडौंको समन्वय तथा इटालीको Trentino For Langtang को सहयोगमा विद्यार्थीहरूलाई विद्यालय पोशाक वितरण गरिएको हो।
विद्यार्थीलाई विद्यालय पोशाक वितरणसँगै विद्यालयका लागि निर्माण गरिएको एक कोठे पक्की भवनसमेत आजै हस्तान्तरण गरिएको छ। मोनभिसो नेपाल फाउन्डेसनले यसअघि निर्माण गरेको चार कोठे भवनमा थप एक कोठा निर्माण गरेपछि विद्यालयमा पाँच कोठाको भवन बनेको हो।
भवन निर्माणका लागि सोलुदूधकुण्ड नगरपालिकाका मेयर नाम्गेल जाङ्बु शेर्पाको पहल महत्वपूर्ण रहेको बताइएको छ। उहाँकै पहलपछि मोनभिसो नेपाल फाउन्डेसनमार्फत विद्यालयमा भवन निर्माण तथा अन्य सहयोग अघि बढेको हो।
कार्यक्रममा वडा अध्यक्ष पासाङ कटुवाल , मोनभिसो नेपाल फाउन्डेसनका अध्यक्ष छोङ्बा लामा शेर्पा, कोषाध्यक्ष लाक्पा तेम्बा शेर्पा, Trentino For Langtang संस्थाका प्रतिनिधि रोजारियो सालाको विशेष उपस्थितिमा विद्यार्थीलाई पोशाक हस्तान्तरण गरिएको हाे ।
कार्यक्रममा विद्यालयका प्रधानाध्यापक सन्तोष खड्काले कार्यक्रमको उद्देश्य तथा नयाँ भवनका विषयमा जानकारी दिनुभयो। उहाँले विद्यार्थीका लागि विद्यालय पोशाक र विद्यालयका लागि आवश्यक पूर्वाधार प्राप्त हुँदा पठनपाठनको वातावरण थप सहज बन्ने बताउनुभयो।
मोनभिसो नेपाल फाउन्डेसनका कोषाध्यक्ष लाक्पा तेम्बा शेर्पाले विद्यार्थीको आवश्यकता र शैक्षिक वातावरणलाई ध्यानमा राखेर विद्यालय पोशाक सहयोग गरिएको बताउनुभयो।
“विद्यार्थीहरूलाई समान र सहज वातावरणमा अध्ययन गर्ने अवसर मिलोस् भन्ने उद्देश्यले विद्यालय पोशाक उपलब्ध गराएका हौँ। १९५ भन्दा बढी विद्यार्थीले पोशाक प्राप्त गरेका छन्। विद्यालयको आवश्यकता पहिचान गर्दै आगामी दिनमा पनि सहयोगलाई निरन्तरता दिने हाम्रो प्रयास रहनेछ,” उहाँले भन्नुभयो।
फाउन्डेसनका अध्यक्ष छोङ्बा लामा शेर्पाले विद्यालयको भौतिक संरचनासँगै विद्यार्थीको प्रत्यक्ष आवश्यकतालाई समेत प्राथमिकता दिइएको बताउनुभयो।
“विद्यालयको भवन निर्माण गर्नु मात्र होइन, विद्यार्थीलाई आवश्यक सामग्री उपलब्ध गराएर उनीहरूको पढाइमा उत्साह थप्नु पनि हाम्रो उद्देश्य हो। विद्यालय पोशाकले विद्यार्थीमा आत्मविश्वास र विद्यालयप्रतिको अपनत्व बढाउन सहयोग गर्छ भन्ने हाम्रो विश्वास छ,” उहाँले भन्नुभयो।
विद्यालय व्यवस्थापन समितिका अध्यक्ष आङकामी शेर्पाले विद्यार्थीका लागि विद्यालय पोशाक र विद्यालयका लागि थप कक्षाकोठा प्राप्त हुनु महत्वपूर्ण सहयोग भएको बताउनुभयो।
“१९५ भन्दा बढी विद्यार्थीले नयाँ विद्यालय पोशाक पाएका छन्। यसले विद्यार्थीहरूमा उत्साह थपिएको छ। यसअघि चार कोठे भवन निर्माण गरेर सहयोग गर्नुभएको संस्थाले फेरि आवश्यकताअनुसार एक कोठा थपिदिएपछि अहिले पाँच कोठाको भवन तयार भएको छ,” उहाँले भन्नुभयो।
विद्यालय परिवारले मोनभिसो नेपाल फाउन्डेसन र Trentino For Langtang, Italy को निरन्तर सहयोगले विद्यालयको शैक्षिक वातावरण, विद्यार्थीको मनोबल र भौतिक पूर्वाधार विकासमा सकारात्मक योगदान पुगेको जनाएको छ।
नयाँ पोशाकमा सजिएका विद्यार्थीहरूको उत्साह र खुसीसँगै सम्पन्न कार्यक्रमले सहयोगको प्रत्यक्ष प्रभाव विद्यालय र विद्यार्थीको दैनिक जीवनमा देखाएको थियो।
