सल्यान – नेचासल्यान गाउँपालिका वडा नं. १ निवासी समाजसेवी व्यवसायी रोशन राई ले मानवता, सेवा र सामाजिक उत्तरदायित्वको अनुपम उदाहरण प्रस्तुत गर्दै स्थानीय समुदायको मन जितेका छन्। आफ्नै तीन वटा सुमो गाडी सञ्चालन गर्दै करिब एक दशकदेखि यातायात व्यवसायमा सक्रिय राईले व्यवसायलाई केवल आम्दानीको स्रोत मात्र नभई समाजसेवाको माध्यम बनाएका छन्।
शुक्रबार भएको सामाजिक सुरक्षा भत्ता वितरणको दिन उनले आफ्नो व्यवसायिक भूमिकाभन्दा माथि उठेर एक साँचो समाजसेवीको पहिचान प्रस्तुत गर्दै वृद्ध आमाबाबा, अपाङ्गता भएका नागरिक, असक्त तथा शारीरिक रूपमा कमजोर व्यक्तिहरूका लागि निःशुल्क सेवा प्रदान गरेका हुन । बिहान ८ बजेदेखि सेवा सुरु गरेका रोशन राईले नेचासल्यान वडा नं. १ का भौगोलिक रूपमा छरिएका, दुर्गम र कच्ची बाटो भएका क्षेत्रहरू टारी फेदी, रुङ्गा, याली, सिमखर्क, लेब्लु, जिब्ली लगायतका स्थानबाट सामाजिक सुरक्षा भत्ता पाउने नागरिकहरूलाई घर–घरमै पुगेर लिन जाने, कार्यालयसम्म पुर्याउने र काम सकेपछि पुनः आफैंले सुरक्षित रूपमा घर–घरमै पुर्याइदिने व्यवस्था मिलाए। यस सम्पूर्ण सेवाका लागि उनले कुनै पनि प्रकारको शुल्क भने लिएनन्।
दुर्गम भूगोल, कच्ची सडक र कठिन यात्राका बाबजुद उनले देखाएको समर्पणले स्थानीय समुदायलाई गहिरो रूपमा प्रभावित बनाएको छ। स्थानीयवासीका अनुसार सामाजिक सुरक्षा भत्ता लिन जानु वृद्ध, अपाङ्गता भएका र अशक्त नागरिकहरूका लागि निकै कठिन हुने गर्छ। यातायातको अभाव, लामो दूरी, कच्ची बाटो र आर्थिक समस्याका कारण धेरै नागरिकहरू नियमित रूपमा सेवा लिन वञ्चित हुँदै आएका थिए। यही यथार्थलाई बुझेर रोशन राईले व्यक्तिगत पहलमा सेवा सुरु गरेका हुन्। उनका अनुसार, “व्यवसाय त जीवन चलाउन आवश्यक हुन्छ, तर आजको दिन सेवा र मानवीयता पहिलो प्राथमिकता हो।” यही सोचका साथ उनले आफ्नो सवारी साधन, समय र श्रम सबै जनताको सेवामा समर्पण गरेका हुन्।
यो सेवा केवल आजको दिनमै सीमित छैन। विगतदेखि नै रोशन राईले विपन्न तथा आर्थिक रूपमा कमजोर नागरिकहरूलाई काठमाडौं–सोलुखुम्बु निःशुल्क यात्रा गराउने, आपत्–विपत् पर्दा निःस्वार्थ रूपमा सहयोग गर्ने, बिरामी, असहाय र पीडित नागरिकलाई यातायात सुविधा उपलब्ध गराउने काम गर्दै आएका छन्। स्थानीय समुदायमा उनी व्यवसायीभन्दा पनि एक भरोसाको पात्र, सहयोगी मनका व्यक्ति र दुःखीको सारथि भनेर चिनिन्छन्। नेचासल्यान वडा नं. १ जस्तो भौगोलिक रूपमा जटिल, दुर्गम र स्रोतसाधन सीमित क्षेत्रका लागि यस्तो सेवाभाव अत्यन्तै महत्वपूर्ण मानिन्छ।
सामाजिक सुरक्षा भत्ता जस्तो राज्यले उपलब्ध गराएको सुविधा नागरिकसम्म सहज रूपमा पुर्याउन निजी क्षेत्रबाट गरिएको यो योगदानले सार्वजनिक–निजी सहकार्यको सकारात्मक उदाहरण पनि प्रस्तुत गरेको छ। स्थानीय जनप्रतिनिधि र बासिन्दाहरूले रोशन राईको यो पहललाई अत्यन्तै प्रशंसनीय कार्यको रूपमा मूल्यांकन गरेका छन्। उनको यो कार्यले समाजमा एउटा स्पष्ट सन्देश दिएको छ , व्यवसायिक सफलता मात्र ठूलो उपलब्धि होइन, मानवता, सेवा र सामाजिक जिम्मेवारी नै समाजको साँचो शक्ति हो।
नाफाभन्दा मानवतालाई प्राथमिकता दिने रोशन राईको कार्यले स्थानीय युवाहरू, व्यवसायीहरू र समाजसेवामा लाग्न चाहने व्यक्तिहरूलाई प्रेरणा दिएको छ। आज नेचासल्यान वडा नं. १ मा रोशन राई केवल तीन वटा सुमो गाडीका सञ्चालक मात्र होइनन्, उनी वृद्ध, असहाय, अपाङ्गता भएका र कमजोर नागरिकका साँचो सारथि बनेका छन्। कठिन भूगोल, कच्ची बाटो र सीमित सुविधाका बाबजुद उनले देखाएको समर्पणले समाजमा सकारात्मक परिवर्तन सम्भव छ भन्ने विश्वास बलियो बनाएको छ। रोशन राईको यो सेवाभावले प्रमाणित गरेको छ कि साँचो समाजसेवा पद, हैसियत वा हैकमले होइन, मानवताको भावनाले जन्मिन्छ र यही भावना आज नेचासल्यानमा उज्यालो बनेर फैलिएको छ।
