लिखुपिके, सोलुखुम्बु । लिखुपिके गाउँपालिका खेलकुद विकास समितिको आयोजनामा चौथो राष्ट्रपति रनिङ शिल्ड प्रतियोगिता–२०८२ आज पौष २५ गतेदेखि सुरु भएको छ। प्रतियोगिता पौष २७ गतेसम्म सञ्चालन हुने आयोजकले जनाएको छ। उक्त प्रतियोगिता लिखुपिके गाउँपालिका वडा नं. ५ भकान्जेस्थित चन्द्रज्योति माध्यमिक विद्यालयको प्राङ्गणमा सञ्चालन भइरहेको छ।
प्रतियोगितामा चन्द्रज्योति माध्यमिक विद्यालय, हिमगंगा माध्यमिक विद्यालय र बुद्ध माध्यमिक विद्यालय गरी जम्मा तीन वटा विद्यालयको सहभागिता रहेको छ। प्रतियोगितामार्फत विद्यार्थीहरूलाई खेलकुदमा सक्रिय बनाउँदै अनुशासन, सहकार्य र प्रतिस्पर्धात्मक भावना विकास गराउने लक्ष्य लिइएको छ।
उद्घाटन समारोहका प्रमुख अतिथि सोलुदुधकुण्ड नगरपालिकाका मेयर नाम्गेल जाङ्बु शेर्पाले राष्ट्रपति रनिङ शिल्डले ग्रामीण क्षेत्रका लुकेका प्रतिभा उजागर गर्न महत्वपूर्ण भूमिका खेलेको बताउनुभयो। उहाँले खेलकुदले स्वस्थ समाज निर्माणमा योगदान पुर्याउने उल्लेख गर्दै यस्ता प्रतियोगितालाई निरन्तरता दिनुपर्ने धारणा राख्नुभयो।
विशेष अतिथि लिखुपिके गाउँपालिका अध्यक्ष मिना कार्कीले गाउँपालिकाले खेलकुद विकासलाई प्राथमिकतामा राख्दै विद्यालयस्तरबाटै प्रतिभा उत्पादनमा जोड दिँदै आएको बताउनुभयो। उहाँले अनुशासित, सक्षम र स्वस्थ पुस्ता निर्माणका लागि खेलकुद अनिवार्य भएको धारणा व्यक्त गर्नुभयो।
त्यस्तै, प्रमुख जिल्ला अधिकारी लीला कुमारी केसीले खेलकुद प्रतियोगिताले विद्यार्थीमा आत्मविश्वास, नेतृत्व क्षमता र सामाजिक सद्भाव विकास गर्ने बताउनुभयो।
कार्यक्रमको सभापतित्व लिखुपिके गाउँपालिका खेलकुद विकास समितिका संयोजक टिकाजंग खड्काले गर्नुभएको थियो। उद्घाटन समारोहमा नेपाल प्रहरी जिल्ला प्रमुख मनोजीत कुवर, सशस्त्र प्रहरी जिल्ला प्रमुख सुरेन्द्र पाण्डे, गाउँपालिकाका सम्पूर्ण वडाध्यक्षहरू, प्रमुख प्रशासकीय अधिकृत, विभिन्न राजनीतिक दलका जनप्रतिनिधिहरू, विद्यालयका खेल शिक्षक, विद्यालय व्यवस्थापन समितिका अध्यक्षहरू तथा स्थानीय सरोकारवालाहरूको उल्लेख्य उपस्थिति रहेको थियो।
प्रतियोगिताका खेलहरू केही दिनसम्म सञ्चालन हुनेछन् भने समापन कार्यक्रम पौष २७ गते सम्पन्न हुने आयोजकले जनाएको छ।
राष्ट्रपति रनिङ शिल्डजस्तो राष्ट्रिय महत्वको प्रतियोगिताले लिखुपिके गाउँपालिकामा खेलकुदको संस्कृति विस्तार गर्नुका साथै विद्यालयस्तरका विद्यार्थीहरूमा अनुशासन, नेतृत्व र आत्मविश्वास विकास गर्न महत्वपूर्ण योगदान पुर्याइरहेको छ। स्थानीय तहको सक्रियता, सरोकारवाला निकायहरूको सहभागिता र समुदायको साथले यस्ता प्रतियोगिताले आगामी दिनमा अझ निरन्तरता पाउने अपेक्षा गरिएको छ। यसले ग्रामीण क्षेत्रका प्रतिभावान खेलाडी उत्पादन गर्दै राष्ट्रिय खेलकुदमा समेत उल्लेखनीय योगदान पुर्याउने विश्वास लिइएको छ।
